Uma Laul

Uma Laulu võistlusõlõ saadõti 26 vahtsõt laulu

Timahavadsõlõ vahtsidõ võrokeelitside laulõ konkursilõ Uma Laul saadõti 26 laulu. Uma Laulu võistluskontsõrt tulõ 5. novvembril alostusõga kell 18 Rõugõ rahvamajan.

Võistlusõ kõrraldaja Tigasõ Merike om laulusaagi üle uhkõ. „Kokko tull pallo häid ja esisugumaidsi laulõ autoridõlt, kelle siän om nii tunnõtuid ku ka suurõmbalõ rahvalõ veidemb teedä laululuujit.“ Hindamiskogo liikmõ Änilase Piitre sõnnu perrä omma’ Uma Laulu võistlusõlõ saadõdu’ laulu’ väega mitmõsugumadsõ’. „Konkursilõ saadõdu’ luu’ kõnõlõsõ’ igävädse ao maailmavalust, armastusõst, luudusõst, a säälsaman om säänest nalla kah, et naara tsilk püksi.“

Konkursilõ saadi laulõ Eliste Kaupo, Hellamaa Kerli, Hirve Sirli, Ilvese Aapo, Kalkuna Mari, Kalla Urmas, Rahmani Jan, Ruuli Hanna-Reet, Tauli Anu, Valgu Toomas ja Meel, Õkva Margit jt. Seokõrdsõ Uma Laulu hindamiskogon omma’ muusik Änilase Piitre, koorijuht Otsari Silja, muusigatiidläne ja kultuuriaokiränik Ruusa Aurora, Vikerraadio muusigajuht Teppani Sten ja võro keele ja muusiga sõbõr Kuuba Rainer.

Laulu kandas ette võistluskontsõrdil, miä tulõ võro keele nädäli seen 5. novvembril Rõugõ rahvamajan. „Kimmäle või kontsõrdist uuta’ vägevät muusikalist õdagut, kon kullõja’ saava’ nätä’ laulõ elävät ettekandmist ja olla’ tunnistajas vahtsidõ võrokeelitside hitte sündümisele,“ lupa Tigasõ Merike. Päält hindajidõ kogo preemjide andas vällä kullõjidõ lemmigu avvohind. Kontsõrdi vaheaol mäng lõõdsamiis Ojasaarõ Toomas ja õdagut juhatas perimüsmuusik Laube Kadri. Osta’ pilet Fientast.

Seokõrdnõ Uma Laul oll joba viies vahtsidõ võrokeelitside laulõ konkurss. Võistlust kõrraldõdas, et härgütä’ autoriid luuma mano võrokeelist lauluvarra ja tävvendä’ võrokeelidse laulu- ja rahvapido Uma Pido laulukavva. Järgmäne Uma Pido plaanitas pitä’ 2029. aastaga 2. piimäkuul Võrol Kubija laululava pääl.

Uma Laulu konkurssi kõrraldasõ’ Võro Selts VKKF ja Võro Instituut.

Teedüst saa mano:
Merike Tigas
tel 5691 6280
merike.tigas@wi.ee
umapido.ee

Uma Laulu võistlusõlõ saadõti 26 vahtsõt laulu.

Valla läts viies vahtsidõ võrokiilside laulõ võistlus Uma Laul. Kae ka võistlusõ Uma Laul kõrda!